लमजुङ/ हिमाली जिल्ला मनाङमा कारोबार गर्दै आएको प्राइम बैंंकको शाखा बन्द भएको छ । मनाङको नासोङ गाउँपालिका – ३ , अन्तर्गत धारापानीमा शाखा स्थापना गरी सेवा प्रवाह गर्दै आएको उक्त कमर्सियल बैंक शाखा बन्द भएको छ ।
गत असारको १ गते मस्र्याङदी नदिमा आएको बाढीले बैंक रहेको घरसमेत बगाएपछि थप कारोबार गर्न समस्या भएकाले शाखा नै बन्द गर्नुपरेको बैंकले जनाएको छ ।
धारापानीको शाखा बन्द गरी सबै कारोबार लमजुङ सदरमुकाम बेसीशहरमाको शाखाबाट प्रवाह गर्ने उक्त शाखाका प्रवन्धक सुरेन्द्र बरालले बताए ।
बाढी र पहिरोका कारण नासोङ गाउँपालिकाको धारापानीका धेरै घरहरुमा क्षति पुगेको र बैंकबाट वित्तीय सेवा प्रवाहका लागि उपयुक्त घरसमेत नपाउँदा शाखा गाभ्नु परेको बैंकले जनाएको छ । सेवा प्रवाहलाई निरन्तरता दिनका लागि बेसिशहर शाखामा गाभ्नको लागि नेपाल राष्ट्र बैंकले अनुमति दिइसकेको र भदौ १ देखि सबै कारोबार बेसीशहर शाखाबाट हुने प्रवन्धक बरालको भनाइ छ ।
एक पालिका एक बैंक अवधारणा बमोजिम २०७५ जेठमा तत्कालीन कैलाश विकास बैंक नासोङ गाउँपालिकाको धारापानीको स्थापना भएको थियो । पछि २०७६ फागुनमा कैलाश विकास बैंक र प्राइम कर्मसियल बैंक गाभिएसँगै धारापानीमा रहेको कैलाश विकास बैंक प्राइम कर्मसियल बैंकमा नामाकरण भई सेवा प्रवाह हुँदै आएको थियो ।
बाढीले कार्यालय रहेको घर बगाउँदा कागजपत्र सहित ७५ लाख भन्दाबढी नगदसमेत बगेको थियो । धारापानीमा प्राइमसहित प्रभु बैंक , नासोङ गाउँपालिकाको प्रशासकीय भवन , स्थायी प्रहरी चोक र केही निजी घरसमेत मस्र्याङदी नदीले बगाएको थियो ।
