लण्डन / विश्वभर महामारीको रूपमा फैलिएको कोरोना भाइरसको प्रकोपबाट बच्न नेपाल बाहिर बसोबास गर्ने नेपाली मध्ये ८८ प्रतिशतभन्दा बढीले कोरोना भाइरस संक्रमण विरुद्धको पूर्ण खोप लिएका छन् ।
गैरआवासीय नेपाली संघका अनुसार विदेशमा ५१ देशमा रहेका बस्ने ८८ प्रतिशत भन्दा बढी नेपालीहरूले खोपको पूर्ण डोज पाएका छन्।
गैरआवासीय नेपाली संघको स्वास्थ्य समितिका संयोजक डा. सन्जिव सापकोटाका अनुसार अष्ट्रेलिया, न्युजिल्याण्ड, हङकङ, माल्दिभ्स, अमेरिका, क्यानाडा, युके, मलेसिया, बहराइन, अफिक्रा, दक्षिण कोरिया लगायतमा रहेका नेपालीहरूले खोप लिएका छन् । तर भारत, बंगलादेश जस्ता देशहरूमा भने ७० प्रतिशतभन्दा कम नेपालीले पूर्ण मात्रा खोप लगाएका छन्।
न्यूनतम खोप उपलब्ध भएका देशहरू देशहरूमा घाना, नाइजेरिया, दक्षिण अफ्रिका, तान्जानिया, युगान्डामा सामान्य जनसंख्याको ३० प्रतिशत भन्दा कम जनसंख्याले खोपको सुविधा प्राप्त गरे पनि त्यहाँस्थित ९० प्रतिशत नेपालीले भने खोप पाएका छन् ।
स्वास्थ्य समितिलाई प्राप्त जानकारीअनुसार नेपाल बाहिर रहेका नेपालीहरूको खोप लिने दर उच्च रहेको छ । यस्तै कोरोनाबिरुद्धको तेस्रो खोप (बुस्टर डोज) सबै देशमा उपलब्ध नभए पनि उपलब्ध भएका देशमा भने नेपालीहरूले तेस्रो खोप समेत लिएका छन् । अहिले सम्म बेल्जियममा ९० प्रतिशत नेपालीले बुस्टर डोज लिइसकेका छन् ।
बेलायतमा रहेका ६० प्रतिशत भन्दा बढी नेपालीहरूले बुस्टर लिएको संयोजक डा सापकोटाले बताए । समितिका अनुसार विदेशमा कार्यरत नेपाली स्वास्थ्यकर्मीहरूले समेत तेस्रो खोप प्राप्त गरिसकेका छन् । हाल विश्वको कुल जनसंख्याको ५१ प्रतिशतले पूर्ण रूपमा खोप लगाएको तथ्यांक छ ।
कोरोना महामारी शुरु भए यता गैरआवासीय नेपाली संघअन्तर्गतको स्वास्थ्य समितिले विदेशमा रहेका नेपालीहरूको स्वास्थ्य अवस्थाको बारेमा तथ्याङ्क संकलन गर्ने, उनीहरूको स्वास्थ्य सम्बन्धमा साचो राख्दै बिभिन्न स्वास्थ्य मुलक जनचेतना कार्यक्रम गर्दै आएको छ ।
संघको स्वास्थ्य समितिअन्तर्गत विदेशमा विभिन्न स्वास्थ्य केन्द्रमा कार्यरत दुई सयभन्दा बढी चिकित्सकहरुले तथ्याङ्क संकलन र जनचेतना कार्यक्रम सम्पन्न गर्न सघाई रहेका छन् ।
स्वास्थ्य समितिद्वारा जारी पछिल्लो तथ्याङ्क सङ्कलन गर्न डा सागर पौडेल (भारत), डा नीतेश अर्याल, लक्ष्मी गिरी (बहराइन), रोशन थापा, कृष्ण भट्ट (अफ्रिका), डा बोधराज सुवेदी (युरोप), एलिजा केसी (जापान), गोविन्द खरेल (बेलायत), गोकर्ण ढकाल (हङकङ), र लोक दाहाल (युरोप)लगायतले सहयोग रहेको स्वास्थ्य समितिले जनाएको छ ।