काठमाडौँ / महालक्ष्मी लाइफ इस्योरेन्स लिमिटेडले माघ २७ गतेदेखि कारोबार सञ्चालनको चौथो बर्ष पूरा गरेको छ । प्रभु लाइफ इन्स्योरेन्ससँग मर्जरका लागि प्रक्रिया अघि बढाइरहेको कम्पनीले संस्थागत सामाजिक उत्तरदायित्वअन्तर्गत विभिन्न कार्यक्रम सञ्चालन गरिरहेको छ ।
कारोबारमा निरन्तर बृद्धिसँगै कम्पनीको राम्रो ब्राण्ड स्थापित गर्न सफल कम्पनीले प्रत्येक वर्ष मूनाफासँगै बीमितहरूलाई दिने बोनसदर पनि अन्य कम्पनी भन्दा राम्रो दिन सफल भएको जनाएको छ ।
कम्पनीले गत आ.व. २०७८÷७९ को पौष मसान्तको तुलनामा चालु आ.व. २०७९÷८० को पुस मसान्तसम्ममा चुक्ता पूँजी ५० प्रतिशत, जगेडा कोषमा ६०.७ प्रतिशत, जीवन बीमा कोषमा ५६.४ प्रतिशत, महाविपत्ति कोषमा ४४.५ प्रतिशत, कर्जा लगानीमा २९.५ प्रतिशत, दाबी भुक्तानीमा ३८ प्रतिशत र मुनाफामा ३५.४ प्रतिशतले बृद्धि गर्न सफल भएको छ ।े
जीवन बीमा बजारमा सबैभन्दा कान्छो कम्पनीको रुपमा आउँदा पुराना स्थापित र पछि आएका कम्पनीहरूसँग अस्वस्थ प्रतिस्पर्धाको बीच गुणस्तरिय कारोबार गर्न ठुलो चुनौती थियो।
कम्पनी स्थापनापछिको निरन्तर दुई वर्षको कोरोनाको अवरोधले पनि शाखा संजाल विस्तार र अभिकर्ता निर्माणमा कठिनाई भोग्नुपरेको कम्पनीको अनुभव छ ।
नेपालको जीबन बीमा बजारमा देखा परेको अनेकौ समस्या र कठिनाईको बीचमा रहेर बीमा सम्बन्धी जनचेतना अभिबृद्धि गर्न तथा गुणस्तरिय व्यवसायसँगै कम्पनीको विस्वासनियता बृद्धिलाई प्राथमिकतामा राखेका थियौ ।
प्रत्येक घरमा एउटा जीवन बीमा, युवासँग महालक्ष्मी लाईफ र महिला सशक्तिकरणमा महालक्ष्मी लाईफ जस्ता जनचेतनामूलक कार्यक्रम लिएर देशैभरी अभियान संचालन गरिरहेको छ।
नेपाल बीमा प्राधिकरणले चैतभित्र अनिवार्य रूपमा पूँजी बृद्धि गर्ने निर्देशन दिएपछि प्रभु लाईफ इन्स्योरेन्ससँग मर्जरको प्रक्रियामा छ ।
भारतिय बीमांकीबाट सम्पत्ती दायित्वको मुल्याङ्कन प्रतिवेदन आउन निकै ढिला भएको कारण निर्धारित समयमा एकीकृत कारोबार गर्न नसकेता पनि चैत्रभित्र मर्जर कार्य सम्पन्न गर्ने लक्ष्य लिएको कम्पनीले जनाएको छ ।
एकीकृत कारोबार पछि बन्ने प्रभु महालक्ष्मी लाईफ इन्स्योरेन्सले मितव्ययी तरिकाले गुणस्तरिय कारोबार सञ्चालन गर्दै लगानीकर्ता र बीमितहरूको हितलाई सधैँ सर्वोपरी हितमा राखेर काम गर्ने कम्पनीले प्रतिबद्धता जनाएको छ ।
