काठमाडौँ / उद्योग वाणिज्य महासङ्घको वरिष्ठ उपाध्यक्ष अञ्जन श्रेष्ठ बनेका छन् । उनका प्रत्यासी उमेशलाल श्रेष्ठले समर्थन गरेसँगै उनी बरिष्ठ उपाध्यक्ष पदमा निर्विरोध भएका हुन् ।
चन्द्र ढकालले सर्वसम्मतका गरेको पहलमा अञ्जनलाई वरिष्ठ उपाध्यक्षमा उमेशले समर्थन गर्ने सहमति जनाएपछि अञ्जन निर्विरोध निर्वाचित भएका हुन् । । पहिलो चरणमा भएको निर्वाचनमा ३ जना मध्येका कुनै पनि प्रत्यासीले ५० प्रतिशत मत नकटाएपछि दोस्रो चरणको निर्वाचनमा अञ्जन र उमेशबिच निर्वाचन हुने पक्का भएको थियो ।
सहमतिका लागि पहल गर्ने भएपछि २ बजेका लागि निर्धारित चुनाव पछि सारिएको थियो । पहिलो चरणको निर्वाचनमा अञ्जनले ३७.९९ प्रतिशत, उमेशले ३१.७१ प्रतिशत र रामचन्द्र संघाइले ३०।४६ प्रतिशत मत पाएका थिए । कम मत प्राप्त गरेका संघाइ भने दोस्रो चरणको प्रतिस्पर्धाबाट बाहिरिएका थिए ।
महासंघको विधानअनुसार वरिष्ठ उपाध्यक्षमा चुनिएको उम्मेदवार तीन वर्षे कार्यकालपछि स्वतः अध्यक्ष हुने व्यवस्था छ । त्यसैगरी महासङ्घको उपाध्यक्षमा हेमराज ढकाल, सुरकृष्ण वैद्य र ज्योत्सना श्रेष्ठ विजयी भएका छन् ।
महासङ्घको यो चुनावमा उद्योगी व्यवसायी अन्जान श्रेष्ठ, उमेशलाल श्रेष्ठ र रामचन्द्र संघाई तीन समूहमा बाँडिएर प्रतिस्पर्धामा उत्रिएका थिए ।
वस्तुगतमा ढकाल विजयी
वस्तुगत उपाध्यक्षमा हेमराज ढकाल विजयी भएका छन् । उमेशलाल समूहबाट चुनाव लडेका उनी ६१ मतसहित निर्वाचित बनेका हुन् ।
ढकाल पूर्व अध्यक्ष चण्डीराज ढकालका भाइ समेत हुन् । कुल खसेको १२३ मतमध्ये ढकालले ६१ मत पाएका थिए ।
यस्तै अञ्जन श्रेष्ठ समूहका मनिषलाल प्रधानले ५३ मत पाएका थिए भने रामचन्द्र संघई समूहका सकुन्तलाल हिराचनले ७ मत पाएका थिए ।
जिल्लानगरमा वैद्य
जिल्ला नगरतर्फको उपाध्यक्षमा सुरकृष्ण वैद्य ४३ मतसहित विजयी भएका छन् । रामचन्द्र संघाई समूहबाट चुनाव लडेका वैद्यका निकटतम प्रतिस्पर्धी अरुण सुमार्गीले ३७ मत पाएका थिए । जिल्ला नगरतर्फ सबैभन्दा बलिया भनिएका दिनेश श्रेष्ठले जम्मा ३४ मत पाएका थिए । कुल ११७ मत रहेको यो समूहमा ३ जना चुनावी मैदानमा उत्रिएका थिए ।
एसोसिएटमा श्रेष्ठ
ज्योत्सना श्रेष्ठ एसोसिएटतर्फको उपाध्यक्ष भएकी छन् । उनका प्रतिस्पर्धी अञ्जन श्रेष्ठ र उमेशलाल श्रेष्ठको प्यानलका भरत आचार्यले ७८१ मत प्राप्त गरे पनि संघई समूहकी उनले कुल कसेको १६४९ मतमा ८४६ मत ल्याएर जित निकालेकी हुन् ।
जिल्लानगर र वस्तुगतमा कुल १८ जना सदस्य निर्वाचित हुनेमा उमेशलाल प्यानलको १० जनाले विजयी हासिल गरेका हुन् ।
जिल्ला नगरतर्फ अञ्जन श्रेष्ठ समूहबाट भने ७ जना व्यवसायी कार्यसमितिमा निर्वाचित भएका छन् । उमेशलालको टिमबाट जिल्ला नगरमा निरक केसी, प्रयास कार्की, अब्दुल वाहिद मन्सुरी, कल्पना गैरे, किशोरकुमार आचार्य, गोकुल श्रेष्ठ, मन्जुकुमार श्रेष्ठ कोजु, मोहनप्रसाद श्रेष्ठ, ताराबहादुर कार्की, उमेश डालमिया र केशवप्रसाद भण्डारी निर्वाचित भएका छन् ।
अञ्जनको समूहबाट नवीन रिजाल, उज्वलप्रसाद कसजु, अमरेशचन्द्र बैदार, पुष्पराज कुँवर, अनिलकृष्ण श्रेष्ठ, कृष्ण कटुवाल र बेदबहादुर श्रेष्ठ निर्वाचित भएका छन् ।
८ जना कार्यसमिति सदस्य उमेशलाल श्रेष्ठको निर्वाचित भएका छन् भने अञ्जन श्रेष्ठको पनि ६ जना सदस्य नै निर्वाचित भएका छन् ।
बस्तुगत सदस्यमा उमेशलाल प्यानलबाट कमला श्रेष्ठ, डा सुबोध कुमार गुप्ता, नानीराज घिमिरे, नरेशलाल श्रेष्ठ, पशुपतिदेव पाण्डे, भक्तबहादुर हमाल, लिलेन्द्रप्रसाद प्रधान र हरिबहादुर कार्की विजयी भएका छन् ।
अञ्जनको टिमबाट भने अरनिको राजभण्डारी, मनोज अधिकारी, रविन पुरी, राजकुमार कार्की, शिवप्रसाद घिमिरे र शोभा ज्ञवाली विजयी भएका छन् ।
