काठमाडौँ / सिम्रिक एयरले नेपाल नागरिक उड्डयन प्राधिकरण (क्यान) को बक्यौता चुक्ता गरेको छ ।
लामो समयदेखि बक्यौता रकम भुक्तानी नगरेको भन्दै प्राधिकणले सिम्रिक एयरको जहाज नै ग्राउण्डेड गरेपछि कम्पनीले ५५ लाख १२ हजार रुपैयाँ भुक्तानी गरेको हो । कम्पनीले उक्त रकम आइतबार बुझाएको प्राधिकरणले जनाएको छ ।
यससँगै प्राधिकरणले सिम्रिकको उडानमा लगाएको प्रतिबन्ध समेत हटेको छ । यसअघि प्राधिकरणले गत बिहीबार सिम्रिकका सबै हेलिकप्टरको उडान रोकेको थियो । प्राधिकरणले शुक्रबारदेखि कम्पनीका सबै उडानमा प्रतिवन्ध लगाएको थियो ।
बक्यौता रकम भुक्तानी नगरेको तथा प्राधिकरणको टोलीले गरेको वित्तीय अडिटबाट सिम्रिक एयरको वित्तीय अवस्था पनि कमजोर देखाएकाले सम्भावित सुरक्षा जोखिमलाई मध्यनजर गर्दै उडानमा रोक लगाईएकोे प्राधिकरणले जनाएको थियो ।
प्राधिकरणले दिएको समय अगाडि नै उडान रोकेर अधिकारको दुरुपयोग गरेको आरोप सिम्रिकले लगाएको थियो ।
कम्पनीले त्रिभुवन अन्तर्राष्ट्रिय विमानस्थलसहित काठमाडौंबाहिरका ३१ वटा विमानस्थललाई बुझाउनुपर्ने ल्यान्डिङ पार्किङ, एयर नेभेगिसनलगायत शुल्क पटक पटक ताकेता गर्दा पनि भुतानी गरेको थिएन ।