काठमाडौँ / नेपाल स्टक एक्सचेञ्ज (नेप्से) परिसूचक निरन्तर घटेर २५ सय बिन्दुको अंकमा आइपुगेको छ । साताको अन्तिम कारोबार दिन बिहीबार सेयर बजारमा राताम्यै भएको छ । 

  साताको सुरुवाती दुई दिनमा नै १०० अंकको गिरावटपछि मंगलबार र बुधबार केही स्थिर देखिएको नेप्सेमा साताको अन्तिम कारोबार दिन पनि करिब ५० अंकको उच्च गिरावट भएको छ ।

नेपाल राष्ट्र बैंकले गरेको मौद्रिक नीति समीक्षापछि निरन्तर घट्दै आएको नेप्सेको गिरावट क्रम आज पनि रोकिएन । जससँगै परिसूचक २५ सय ८४ अंकमा आइपुगेको हो ।

प्रि–ओपन सेसनमा केही वृद्धि भए पनि नियमित सेसन सुरु भएपछि सुरुवातबाट नै घट्दो क्रममा देखिएको नेप्से ४९.०४ अंकको गिरावट हुँदा २५८४.६१ अंकमा बन्द भएको छ । बजार घटेको दिन आज साताको अन्तिम दिन कारोबार रकममा पनि चमक देखिएन । 

 कारोबार अवधिभर जम्मा ७९ लाख कित्ता सेयर खरिद बिक्री भएर ३ अर्ब ४१ करोड रुपैयाँ बराबरको कारोबार भएको छ । सुरुवातमा कारोबार रकम न्यून भए पनि अन्तिममा बजार परिसूचक तल झर्दा कारोबार रकम भने केही उकालो लागेको छ ।

करिब ५० अंकको गिरावट आएको दिन कारोबार भएका १३ वटै समूहमा गिरावट आएको छ । घटेकामध्ये निर्जीवन बीमा समूहमा सबैभन्दा बढी २४५ अंकको, जीवन बीमा समूहमा २३० र विकास बैंक समूहमा १८९ अंकको गिरावट आएको छ । 

 यस्तै, आज उत्पादनमूलक १४५ अंकले, वित्त समूहमा ७५ अंक, होटल र टुरिजम समूहमा ६२ अंकको गिरावट आएको नेप्सेले जानकारी दिएको छ ।

बजार घटेपनि आज सामलीङ पावर कम्पनीको सेयर मूल्य ९.९९ प्रतिशतले वृद्धि भएको छ । जससँगै कम्पनीको सेयर मूल्य प्रतिकित्ता ४६ रुपैयाँले बढे ५०७ रुपैयाँ पुगेको छ । यस्तै, न्यादी हाइड्रोपावरको सेयर मूल्य ९.९८ प्रतिशतले बढेर प्रतिकित्ता ४१३ रुपैयाँ पुगेको छ ।

आज नेप्सेमा १८९ कम्पनीको  सेयर कारोबारमा आएकोमा १७७ कम्पनीको  सेयर मूल्यमा गिरावट भएको छ भने ११ कम्पनीको  सेयर मूल्य बढेको छ । एक कम्पनीको सेयर मूल्य भने स्थिर रह्यो ।

आज कारोबारमा आएका मध्ये न्यादी हाइड्रोपावर र सामलिङ पावर कम्पनीको  सेयर मूल्य बढेर सर्किट लेभलमा बन्द भएको छ । सेयर मूल्य बढेर सर्किट लेभमा बन्द हुने दुवै कम्पनी सार्वजनिक निष्कासनपछि हालै मात्रै दोस्रो बजारमा कारोबार सुरु भएका हुन् ।

यस्तै, आज मात्र बोनसपछि सेयर मूल्य समायोजन भएको महिला लघुवित्तको सेयर मूल्य ८.५०प्रतिशत, नेपाल एसबिआई बैंकको १.६९ प्रतिशत र सबैको लघुवित्तको सेयर मूल्य १.६० प्रतिशतले बढेको छ ।

सेयर मूल्य घट्नेमा भने कर्पोरेट डेभलपमेन्ट बैंक अगाडि रहेको छ । बैंकको सेयर मूल्य ६.८० प्रतिशतले गिरावट हुँदा मैलुङखोला जलविद्युत् कम्पनीको ६.७५ प्रतिशत र श्री इन्भेष्टमेन्ट एन्ड फाइनान्सको ५.५७ प्रतिशतले घटेको छ ।