काठमाडौँ / उपकार लघुवित्त वित्तीय संस्था लिमिटेडले चौथो वार्षिक साधारण सभा गर्ने भएको छ ।
कम्पनीको माघ २२ गते साझ बसेको सञ्चानल समितिको ५७ औँ बैठकले साधारण सभा फागुन १८ गते बिहीबार गर्ने निर्णय गरेको हो । सभा बैजनाथ १, गाभर भ्याली (सामुदायिक होमस्टे) बाँकेमा गर्ने कम्पनीले जनाएको छ ।
सभाले गत आर्थिक वर्षको मुनाफाबाट शेयरधनीहरुलाई वितरण गर्ने लाभांश प्रस्ताव पारित गर्न साधारण सभा आयोजना गर्न लागेको हो ।
सभाले हाल कायम चुक्ता पूँजीको ६१.८५ प्रतिशत बोनश शेयर र सोको कर प्रयोजनार्थ ३.२५ प्रतिशत नगद लाभांश गरी कुल ६५ प्रतिशत लाभांश वितरण गर्ने प्रस्ताव पारित गर्नेछ । यसका साथै सभाले संस्थापक समूहबाट २ जना र सर्वसाधारण समूहबाट २ जना सञ्चालकहरुको निर्वाचन गर्ने प्रस्ताव पनि पारित गर्नेछ।
साधारण सभा तथा लाभांश वितरण प्रयोजनार्थ लघुवित्तले फागुन ४ गते एक दिनका लागि बुकक्लोज गर्ने भएको छ। त्यसकारण फागुन ३ गतेसम्म नेप्सेमा कारोबार भइ कायम शेयरधनीहरुले लघुवित्तको साधारण सभामा भाग लिन र लाभांश प्राप्त गर्न सक्नेछन्।
