काठमाडौँ / नेपाल राष्ट्र बैङ्कले अर्थतन्त्रमा सुधार आएको तथ्याङ्क सार्वजनिक गरेकै दिन आज मङ्गलबार सेयर बजारमा दोहोरो अङ्गको सुधार आएको छ । यो दिन नेपाल स्टक एक्सचेन्ज (नेप्से) परिसूचक आज २७.३१ अङ्कले बढेर एक हजार ८ सय ७१.३३ अंकमा उक्लिएको हो ।
आजको कारोबारमा दुई सय ६२ वटा कम्पनीको ३३ लाख १५ हजार ७ सय २० कित्ता सेयर ३५ हजार २ सय ३७ पटक खरिदबिक्री हुँदा कारोबार रकम भने रु ९४ करोड ५२ लाख ४९ हजारमा खुम्चिएको छ । सबै समूहको उपसूचक बढेको छ ।
सबैभन्दा धेरै उत्पादन समूहको उपसूचक १३९.९१ र जीवन बिमा समूहको उपसूचक ८६.१० अंकले बढेको छ । बैङ्किङ समूह १६.७७, विकास बैङ्क समूह ७९.१८, वित्त समूह ३७.४८, होटल तथा पर्यटन समूह ५३.२२ र जलविद्युत् समूह ३७.९४ अंकले बढेको छ ।
त्यस्तै, लगानी समूह ०.७६, लघुवित्त समूह ४९.७५, म्युचुअल फन्ड समूह ०.१६, निर्जीवन बिमा समूह ६२.९२, अन्य समूह १७.४६ र व्यापार समूह २१.९८ अङ्कले बढेको छ ।
पछिल्ला दिनहरुमा लगातार सकारात्मक सर्किट लाग्दै आएको कालिञ्चोक दर्शन लिमिटेडको सेयर मूल्यमा आज पनि सकारात्मक सर्किट लागेको छ । त्यस्तै, आदर्श लघुवित्त वित्तीय संस्था लिमिटेडको शेयर मूल्य ९.६९ प्रतिशतले बढेको छ ।
असानिमा मिडिल तमोर हाइड्रोपावर लिमिटेडको सेयर मूल्य ३.५४ प्रतिशतले घटेको छ । आज कारोबार रकमका आधारमा सबैभन्दा धेरै शिवम् सिमेन्ट लिमिटेडको रु ७ करोड १० लाख ९३ हजार बराबरको कारोबार भएको छ ।
कारोबार भएका सेयर सङ्ख्याका आधारमा भने सबैभन्दा धेरै प्रभु बैङ्क लिमिटेडको एक लाख ८७ हजार ५ सय ९४ कित्ता सेयर किनबेच भएको छ ।