काठमाडौँ / निजी क्षेत्रमा कर्जा लगानी घटेको छ । सरकारले सार्वजनिक गरेको आर्थिक वर्ष २०७९/८० को आर्थिक सर्वेक्षणले निजी क्षेत्रतर्फको कर्जाको विस्तार ४.६ प्रतिशतले मात्रै बढेको तथ्याङ्क देखाएको हो ।
कोभिड–१९ को प्रभाव न्यून भएसँगै आर्थिक वर्ष २०७७/७८ मा २६.३ प्रतिशतले बढेको निजी क्षेत्रतर्फको कर्जा आर्थिक वर्ष २०७८/७९ मा १३.३ प्रतिशतले वृद्धि भएको थियो भने आर्थिक वर्ष २०७९/८० को फागुनसम्म ४.६ प्रतिशतले मात्रै वृद्धि भएको छ ।
मर्जर तथा प्राप्तिका कारण बैङ्क तथा वित्तीय संस्थाको सङ्ख्या घट्दै गएता पनि बैङ्क तथा वित्तीय संस्थाको शाखा सञ्जाल विस्तार भएको कारण वित्तीय पहुँच वृद्धि हुँदै गएको सर्वेक्षणमा भनिएको छ ।
बैंकहरूको शाखा विस्तारसँगै बैङ्किङ्ग कारोबार गर्ने जनसङ्ख्या पनि उल्लेख्य बढेको तथ्याङ्कले जनाएकोे छ । २०७९ फागुनमा बैङ्क तथा वित्तीय संस्थामा निक्षेप खाता ४ करोड ९२ लाख ५ हजार, कर्जा खाता १८ लाख ५४ हजार, मोबाइल बैङ्किङ्ग प्रयोगकर्ता २ करोड ६५ हजार र इन्टरनेट बैङ्किङ्ग सेवाका प्रयोगकर्ता १७ लाख ७९ हजार पुगेको छ । चालु आर्थिक वर्षको फागुनसम्म २५ हजार कर्जा खाता र ४२ लाख ३३ हजार निक्षेप खाता थप भएका छन् ।
२०७९ फागुनमा लघुवित्त समेत बैङ्क तथा वित्तीय संस्थाको शाखा सङ्ख्या ११ हजार ६ सय २९ पुगेको छ । बैङ्क तथा वित्तीय संस्थाको शाखाका आधारमा प्रति शाखा औसत जनसङ्ख्या २ हजार ५१० रहेको छ । यस्तो जनसङ्ख्या २०७८ फागुनमा २ हजार ५७२ रहेको थियो ।
