काठमाडौँ / मङ्गलबार सुनको मूल्यले पुनः नयाँ कीर्तिमान कायम गरेको छ । नेपाल सुनचाँदी व्यवसायी महासङ्घले सार्वजनिक गरेको मूल्यसूची अनुसार आज प्रतितोला १७ सय रुपैयाँले बढेर सुनको भाउ हालसम्मकै उच्च कायम भएको हो । 

सोमबार नेपाली बजारमा छापावाल सुन प्रतितोला १ लाख ३७ हजार ५ सय रुपैयाँ तोकिएको थियो । आज भने यो सुनलाई एक प्रतितोला १ लाख ३९ हजार २ सय रुपैयाँ पर्नेछ । यसअघि गत चैत ३० गते शुक्रबार सुनको भाउ सबैभन्दा बढी १ लाख ३९ हजार रुपैयाँ पुगेको महासङ्घले जनाएको छ ।

त्यस्तै, तेजावी सुन प्रतितोला १ लाख ३६ हजार ८ सय ५० रुपैयाँ तोकिएकोमा १ लाख ३८ हजार ५५० रुपैयाँ पर्नेछ । 

यता, चाँदीको मूल्यसमेत प्रतितोला ३५ रुपैयाँले बृद्धि भएको छ । यसअघि प्रतितोला १ हजार ७ सय १५ रुपैयाँ पर्ने चाँदीलाई आज १ हजार ७ सय ५० रुपैयाँ पर्नेछ ।