.jpg)
काठमाडौँ / नेपाल भित्रिने कुल पर्यटकमध्ये ६० प्रतिशत पर्यटक बिदा मनाउने उद्देश्यले आएको पर्यटन मन्त्रालयले जनाएको छ ।
संस्कृति, पर्यटन तथा नागरिक उड्डयन मन्त्रालयले सार्वजनिक गरेको तथ्याङ्क अनुसार सन् २०२३ मा बिदा मनाउने उद्देश्यले ६० प्रतिशत पर्यटक नेपाल आएका हुन् ।
मन्त्रालयको तथ्याङ्क अनुसार सन् २०२३ मा विभिन्न देशबाट १० लाख १४ हजार ८८२ पर्यटक नेपाल भ्रमणमा आएका थिए । जसमध्ये ६ लाख ३४ हजार ३०१ पर्यटक बिदा मनाउन आएको पर्यटन मन्त्रालयले प्रकाशित गरेको पछिल्लो प्रतिवेदनमा उल्लेख छ ।
यस्तै, पछिल्ला वर्षहरूमा हिमाल आरोहण र ट्रेकिङका लागि आउने विदेशी पर्यटक बढ्दै गइरहेका छन् । सन् २०२३ मा एक लाख ५४ हजार २६२ पर्यटक ट्रेकिङ र हिमाल चढ्न आएका थिए । यो संख्या कुल पर्यटकको १५.२ प्रतिशत हो ।
पछिल्लो समय नेपालको सगरमाथा, अन्नपूर्ण सर्किट, खप्तड, फोक्सुन्डो, डोल्पो क्षेत्र, माछापुच्छ्रे, अन्नपूर्णलगायत विभिन्न हिमालका बेसक्याम्प ट्रेकिङका आकर्षक गन्तव्य बन्दै आइरहेका छन् ।
यस्तै, गत वर्ष धार्मिक पर्यटकको संख्या एक लाख ३३ हजार रहेको थियो, जुन कुल पर्यटकको १३.१ प्रतिशत थियो । नेपालको पशुपति, मुक्तिनाथ, जनकपुर, लुम्बिनीलगायतमा आउने विदेशी भक्तजनहरू धेरै हुन्छन् ।
त्यसैगरी, अन्य उद्देश्यसहित आउने पर्यटक ९३ हजार ३७० अर्थात् ९.२ प्रतिशत रहेका थिए ।
प्रतिव्यक्ति प्रतिदिन ४१ डलर खर्च
मन्त्रालयको तथ्याङ्क अनुसार २०२३ मा पर्यटकले प्रतिव्यक्ति प्रतिदिन औसत खर्च ४१ अमेरिकी डलर खर्च गरेका छन् ।
सन् २०२३ मा नेपाल भ्रमणमा आएका पर्यटकबाट ५४ करोड ८२ लाख अमेरिकी डलर अर्थात् करिब ७३ अर्ब रुपैयाँ (एक डलरको नेपाली विनिमयदर १३३ रुपैयाँ) आम्दानी भएको पर्यटन मन्त्रालयले जनाएको हो ।
सन् २०२२ मा प्रतिव्यक्ति प्रतिदिन औसत खर्च ४०.५ अमेरिकी डलर थियो । उक्त बर्ष पर्यटनबाट ३५ करोड ९७ लाख अमेरिकी डलर आम्दानी भएको थियो ।
औसत बसाइ १३.२ दिन
गत वर्ष पर्यटकको औसत बसाइ १३.२ दिन रहेको छ । अघिल्लो वर्ष सन् २०२२ मा औसत बसाइ १३.१ दिन, २०२१ मा १४.५, २०२० मा १५.१ दिन रहेको थियो ।
तथ्यांकले नेपालमा पर्यटकको औसत बसाइदर घट्दै गएको देखिन्छ । सन् १९७५ मा पर्यटकको औसत बसाइ १३.०५ दिन थियो । यसबीचमा सबैभन्दा धेरै बसाइ सन् २०२१ मा १५.५ दिन रहेको छ ।
नेपाल एयरलाइन्स सबैभन्दा धेरै अन्तर्राष्ट्रिय यात्रु बोक्ने एयरलाइन्स
सन् २०२३ मा कतार एयरलाई उछिन्दै नेपाल एयरलाइन्स सबैभन्दा धेरै अन्तर्राष्ट्रिय यात्रु बोक्ने एयरलाइन्स बनेको छ । सन् २०२२ मा सबैभन्दा धेरै यात्रु बोक्नेमा कतार एयर थियो ।
गत वर्ष दोस्रो नम्बरमा कतार एयरवेज, तेस्रोमा हिमालय एयरलाइन्स, चौथोमा इन्डिगो एयर र पाँचौँ नम्बरमा फ्लाई दुबई रहेका छन् ।
.gif)
