काठमाडौँ / नेपाल स्टक एक्स्चेन्ज (नेप्से) ले सूचीकृत कम्पनीहरुको नयाँ वर्गीकरण गरेको छ । नेप्सेले सूचीकृत २७१ कम्पनीहरुलाई ए, बी, जी र जेड गरी ४ वर्गमा वर्गीकरण गरेको हो । 

आर्थिक वर्ष २०८०/८१ पुस मसान्तसम्म अद्यावधिक विवरणअनुसार कम्पनीहरु वर्गीकरण गरेको नेप्सेले स्पष्ट पारेको छ ।  नेप्सेको वर्गिकरण अनुसार १९ वाणिज्य बैंकहरु मध्ये ८ वटा ए मा, ७ वटा बी मा र ४ वटा जेड समूहमा वर्गिकृत भएका छन् ।

चुक्ता पूँजी कम्तीमा १ अर्ब रहेको, सूचीकरण भएको कम्तीमा ३ वर्ष पूरा भएको, विगत ३ आर्थिक वर्ष लगातार नाफामा रही लाभांश वितरण गरेको, आर्थिक वर्ष समाप्त भएको ६ महिनाभित्र वार्षिक साधारणसभा गरेको जस्ता शर्तहरु पूरा गर्ने कम्पनीहरु ए वर्गमा पर्ने गर्छन् । समग्रमा उत्कृष्ट सुशासन भएका कम्पनी ‘ए’ समूहभित्र पर्दछन् । सो ‘ए’ वर्गभित्र ३१ वटा कम्पनी परेका छन् ।

त्यस्तै चूक्ता पूँजी कम्तीमा ५० करोड भएका, सूचीकरण भएको ३ वर्ष पूरा भएको, विगत तीन आर्थिक वर्षमध्ये दुई आर्थिक वर्ष नाफा गरेको, संचित नोक्सानी नरहेको, आर्थिक वर्ष समाप्त भएको ६ महिनाभित्र साधारणसभा गरेको जस्ता शर्त पूरा गरेका कम्पनी बी समूहभित्र पर्दछन् । यस समूहभित्र नेप्सेले ३५ वटा कम्पनीलाई राखेको छ ।

त्यस्तै सूचीकृत भएको २ वर्ष पनि पूरा नभएका कम्पनी जी समूहमा पर्दछन् भने अघिल्ला ३ समूहमा नपरेका सबै कम्पनी जेड समूहमा पर्दछन् । जी समूहमा ७० र जेड समूहमा १३५ कम्पनीहरु परेका छन् ।

यस्तै, सार्वजनिक गरिएको वर्गीकरणमा परेको संगठित संस्थाले उल्लेखित समूहमा पर्नु नपर्ने कारणसहित ३५ दिनभित्र दाबी गर्न सक्ने नेप्सेले जनाएको छ।

वर्गीकृत कम्पनीहरूको सूचीः